Issittut Avannarliit
Qalasersuup eqqaaniipput Issittut Avannarliit. Annersaat Sikuiuitsuuvoq, aammali ilagai Europap, Asiap Amerikallu Avannarliup avannarlerpaartai. Kalaallit Nunaat tamarmi Issittunut ilaavoq.
Issittut orpeqarfiup avannaaniittuusutut nassuiarneqartarput. Nunai masarsuupput qeriuaannartumik natillit, tamaaniillutik orpikkat, ivikkat naasullu. Kiannerpaaffiisa agguaqatigiissillugu 10 gradit C-it ataassimavai. Issittut nunarujussuartaqarput pinngortitatut allanngortitaanngitsunik, issittunilu uummaviit malussarissupilussuupput.
Issittuni imarpiup qaava sermersuaanani immap sikoraa, tamatumalu siammarsimassusia ukiup qanoq ilineranit, kissassutsinit, immap sarfaanit anorinillu aqutarineqarpoq. Tamatuma Qalasersuaq Sikuiuitsumit Kujallermit allaanerulluinnartippaa. Qalasersuaq imarpimmiippoq immap tarajullip sikuanit qallersimasumi, Sikuiuitsoq Kujalleq 2.8 km-inik qatsissusilimmiippoq, nunavittaata 98 procent-ia sermersuarmik tarajoqanngitsumik qallersimalluni.
Issinnerpaap orpigai 5-10 cm-iinnaalersarput. Avannarpiaalumi inoqajuitsuuvoq. Naasoqanngilaq Saharatullu apummik/sialummik takussaasoqanngitsigaaq. Issaasannermi orpikkat meterip affaa tikissinnaavaat.
Kalaallit Nunaata avannarpiaaniippoq issinnerpaaffik, tamaaniippullu issittup inoqajuitsuisa ilaat. Nunap kujataa’tungaa issaasannermiittuuvoq.
Issittut Avannarliit - Sikuiuitsoq Kujalleq
Arlalissuit Arktis Antarktisimut paarlaattarpaat, kingullerli nunavimmut Sikuiuitsumut Kujallermut taaguutaavoq. Aqqinut nassuiaataasinnaavoq griikeritoqqat ullorissat taaguutillit Lille Bjørn Qaasuitsup Ulloriaanik avannarlersallit takusinnaasimammatigit avannaajutitaminnullu atsiullugit. Arktikos, Arktis, isumaqarpoq nanoq. Ant-Arktikos isumaqarpoq nannup akerlia.