Uumasoqarneq allanngussaaq
Issittumi allannguutit sakkortunerpaat ilaat immami sikumi allannguutinit malunnaatilinnit patsiseqarput. Kalaallit Nunaanni uumasoqarnermut, pingaarnertut immamut attaveqartumut sunniutaa annertoqaaq. Aalisagarpassuit saniatigut immami miluumasoqarpoq arlalinnik, taakkununnga puisit suussusaat tallimat ilaatigut ilaallutik.
Suussutsit immami sikumi pissutsinit allanngorsimasunit attorneqarnerpaasut tassaapput nerisassarsiornerminni, kinguaassiornermi aamma uumasunik kiisortunik aniguiniarnermut sikumik atugaqartut. Assersuutigalugit tassaapput aataarsuaq, nanoq, qilalugaq qernertaq aamma aaveq.
Alaskap avannaani Beaufortip imartaani sikumi maniilarsuarmi nannut piaqqallit amerlassusaat ukiuni 20-ni kingullerni 50 procentinik ikileriarsimapput, pissutaavorlu siammarsimassusaat sinerissamut qanillisimanera. Taamatut nikeriarnerat nassuiarneqarsimavoq sikut maniilarsuit tikikkuminaallisimanerat.
Sumiiffinni allani immami sikuerutiaartarnerata nassatarisaanik natsiup piaqqiorluartarnera annikillisimavoq, aammalu puisit piaqqiorfissaanni piffissami aput saannerulersimalluni.
Aavermulli, immap naqqani uilortortariaqartumut, immami sikup annikillinera iluarinarpasippoq. Ukiup annersaani Kalaallit Nunaata Tunuata Avannaani uiloqarfissuit immap sikuanik silittorsuarmit mattussaasimasarput, tamaanilu ullumikkut sikueruffiusumi aasakkut qaammatialunnguaannarni aarrit nerisassarsiorsinnaasarput. Siunissami tamaani ukiup ingerlanerani sivisunerusumi imaq sikuerunnerusalerpat aarrit puallarsarluarsinnaalissapput.
