Arfivik naleqqussarluarsinnaavoq
Ukiuni untritilikkaani Issittumi silap pissusaa assorsuaq allanngorarfiusarsimavoq, atugassarititanullu tamakkununnga allanut naleqqiullutik suussutsit ilaat naleqqussarsinnaasimapput.
Arfiviit ukiut 200-t sinnerlugit utoqqaatigilersarput – imaluunniit qilalukkat qernertat ukiuisa marloriaataasa missaannik – taamaattumillu piffissami sivisunerusumi silap pissusaanik allanngorartunik arfiviit kingoraariikkaat atugaqartarsimassapput.
Qilalukkanut qernertanut paarlaguttumik arfiviit annertoorsuarnik ilaatigullu siumut oqaatigineq ajornartumik ingerlaarsinnaasuupput, sumiiffinni nutaani amerlasoorsuullutik takkussimasinnaasarlutik. Tamatuma sananeqaatimikkut annertuumik assigiinngissuseqarneq peqatigalugu silap pissusaatigut uumaffinnilu atugassarisanut pingaarnernut naapertuisunik amerlassutsiminnik assigiinngiiaarinissamik naleqqussaanissamillu periarfissippaat.
Arfivinnut immikkuullarissutaasoq aamma tassaavoq orsoqarmata meterip affaanik silitsigingajattumik. Immamut nillertumut najortakkaminnut oqorsarnissamut pisariaqartitaannik sinneqarpoq. Orsuat nukissamik toqqorsivittut aamma atuuppoq, tassannga naammaginartumik planktoninik pingaarnerutillugu uumassutigisaminnik nassaarnissaq ajornartorsiutigileraangamikku inuussutissaminnik pissarsiaqartarput.
Ukiumit ukiumut planktonit naajorarnerit assigiinngisitaartartuupput, ukiunilu planktoniliorneq ajalusooraangat inuussutissaqarfigisaminnik arfiviit nerisassaateqartuarput.