CO2-mik unerartitsinermi immap sikua aalajangiisuulluinnartumik inissisimavoq
Siusinnerusukkut paasisimasamut naleqqiullugu CO2-mik unerartitsinermut immap sikusarnerata pingaaruteqarnera annertuneruvoq. Immap sikua CO2-mik silaannarmit immap naqqanut assartuutitut pingaarutilimmik atuuffeqarpoq, immallu sikuata nungukkiartornera ilutigalugu CO2-ip silaannarmiigunnaartillugu unerartinniarnissaanut periarfissat annertuumik ajorseriartussaapput.
Taamatut inerniliivoq professor Søren Rysgaard, Kalaallit Nunaanni Silap pissusaanik ilisimatusarfiup pisortaa aammalu issittumi immap sikuanit CO2 qanoq annertortigisoq qanorlu iliorluni immap naqqanut assartorneqartarnersoq misissuinissaq siunertaralugu ilisimatusarnikkut suliniummi aqutsisuusoq. 2009-mi juunimi ilisimatuut allat sisamat peqatigalugit misissuinerup inerneri Journal of Geophysical Research – Ocean-imi saqqummersippai.
Ukiukkut immap qaava sikugaangat CO2 ilti taratsullu peqatigalugit immap naqqanut naqigunneqartartoq ilisimatusarnerup takutippaa. Aasakkut imaroraangat immap qaavani CO2 annikitsuinnaasarpoq, taamaalillunilu CO2-mik annertunermik unerartitsinissamut inissaqartitsilerluni. Tamanna CO2-ip silaannarmit immamut ingerlaartinnissaanut pissusissamisoortumik aallartitsisarpoq. Ingerlaarneq taanna nammineq ingerlasarpoq, tassami immap qaava tamatigut silaannarmituulli annertutigisumik CO2-mik akoqarniarsarisarpoq. Ukiut tamaasa immap qaavanit kulstoffi silaannarmiittoq annertoorsuaq immap iluanut ingerlaartarpoq, ullumikkullu CO2 silaannarmit 50-eriaammik annertunerusoq imarpiit naqqanniippoq.
Kissatsinnerulerpat immap sikuusarnera annikillissaaq, taamaalillunilu nammineq ingerlaartussaq annikillissaaq immamilu CO2-mik unerartitsisinnaaneq annikinnerulerluni.
Søren Rysgaardip naliliinera malillugu nunarsuarmi imarpiit CO2-mik unerartitsinerisa 30-40 procentii angullugit immap sikuneranut atatillugu pisarpoq. Taamaattumik silaannarmi CO2-ip annertussusaanut immap sikuusarnera aalajangiisuulluinnartumik pingaaruteqarpoq. Issittoq Kalaallit Nunaata, Islandip, Norgep aamma Svalbardip akornanniittoq nunarsuarmi sumiiffiit immap silaannarmit CO2-mik annertunerpaamik unerartitsiffiunerpaasartut ilagaat, tassami tamaani imaq annertoorujussuarmik sikoqalertarpoq.
Denne side er printet fra www.cop15.dk/klimaforandringer/havisen_traekker_sig/havisens_rolle_for_optag_af_co2_/