Issittumi aamma Antarktisimi FN-imi Silap pissusaanik Paasisimasallit siunniussatut inissitsitersimasaanni tamani immap sikua annikillivoq.
Silap pissusaanut ilusiliussat issittumi aasaanerani immami siku ukiut untritillit 21-ata qeqqaniit imaluunniit naaneraniit nunguissasoq siulittuutigaat. Ukiumili ataasiinnarmi siku 1 mio. km2 nunguissinnaappat silap pissusaanut ilusiliussat tunngavilugit naatsorsuutinut naleqqiullugit immap sikuata annikilliartornera piaarnerusumik pisinnaassaaq.
Paarlattuanilli aamma aalaakkaanerulerneq pisinnaavoq. 1998-imit 1999-imut immap sikuata annikillinera ukiunit aalaakkaaffiusunit malitseqarpoq.
Kangerlunni aamma immami sikoqarnerata allanngornissaa ilimanaateqarluinnarpoq. Sikuusoq saannerulissaaq, piffissarlu sikoqarfiunngitsoq sivitsorluni. Taamaalinera immami annertunermik qaamanermik pilersuilissaaq, algillu alliartornissaannut atugassat pitsanngorsarlugit. Paarlattuanik Tunup sineriaa atuarlugu aammalu Kitaata sineriaa atuarlugu avannarpartilaartumik imeq nillernerusoq tarajukinnerusorlu sarfannguutissaaq, tamatumalu algit alliartornerannik annikillisaavoq. Algit annertunerusumik alliartornissaannik kinguneqassappat immami inuussutissat uiguleriiaanut taamaalillunilu aalisarnermut tamanna assorsuaq sunniuteqassaaq.
Tamakku ilutigalugit immami sikup annikillineratigut piniartunut aallaanianullu atugassat assorujussuaq ajortunngussapput.