Allannguutit inuup piliai
Ukiut untritillit makku ingerlaneranni nunarsuarmi kissassuseq qaffassimavoq. Taamaakkaluartorli kissassutsit allanngorartuarsimapput. Tamatuma erseqqilluinnartumik sermersuarmi qillerinerit misissorluaqqissaarnerisa uppernarsarpaat. Silap pissusaani allannguutit ilarparujussui inuit piliaaneersuunerisa ilimanarluinnarneri maannakkorpiaq immikkut ittuuvoq.
Kissassutsimi allanngoraatit arlalissuarnik patsiseqarsinnaapput, soorlu seqinermit kissassutsip annertussusaani allannguutit aamma illup naatitsiviup sunniutaa.
Seqernup qinnguai utertitsisarnerlu
Seqernup qinnguaata nunarsuarmut annguttut ilarujussui avataarsuanut uterteqqinneqartarput, taamaattumillu nunarsuatsinnik kissassaanatik. Uterteqqinneqartut qanoq annertutigineri ilaatigut nuissanit, apummit sermimillu aalajangerneqartarput. Utertitsinerup annertussuseqarnera Nunarsuatsinni qanoq kissatsigineranut assorsuaq aalajangiisuusarpoq. Tamanna ilutigalugu Seqineq kaajallallugu Nunarsuup aqqutaani allanngorarnerit, Nunarsuup uinganera il.il. Nunarsuarmut ingammillu Issittumut seqernup qinnguaasa apuunnerinut apeqqutaasarput.
Illup naatitsiviup gassii
Illup naatitsiviup gassii erngup aalannguunnera aamma kuldioxid, CO2, kiisalu nuissat Nunarsuaq kaajallallugu oqorsaasumik qalliipput, pinngortillugu illup naatitsiviup sunniutaa Peqanngikkaluarpat Nunarsuaq maannamut naleqqiullugu nillernerujussuussaaq. Illup naatitsiviup gassiisa amerlassusaat annertusippata oqorsaasoq alliartussaaq, tamatumalu kiak avataarsuanut anillatsinnaveerpaa. Nunarsuarput kissannerulissaaq.
Sunniut imminik sakkortusartoq
Kissakkiartuaartumik pisoqarpat aputip sermillu annertussusai annikillisinneqassapput. Tamatuma nassataraa seqernup qinngornerisa utertinneri annikillisissasut. Taamaalilluni kissakkiartornera imminik sakkortusalissaaq, tamannalu ilaatigut takuneqarsinnaavoq Issittup kissanneruneratigut.
1700-kkut qeqqisa kingorna suliffissuaqalerfittut mumisitsinerup kingorna silaannartami CO2-p annertussusaa 35 procent-it missaannik qaffariarsimavoq, aammattaarli illup naatitsiviup gassiata allap, metanip annertussusaa inupp suliai pissutaallutik qaffariarsimavoq. Silap pissusaanik ilusiliussat tunngavigalugit naatsorsuutit inuup piliaanik illup naatitsiviup gassiisa annertussusaata aammalu kissassutsip qaffakkiartuaarnerisa akornanni ataqatigiittoqarnera takutippaat.