Sermersuarmi qillerinerit
Sermersuaq Arktisimiittoq Antarktisimiittorlu ukiuni tuusintilikkuutaani apisarnerup serminnguunneranut toqqorsivittut ipput. Sermeq qillerivigalugu qanorluunniit ititigisumit misissugassanik qalluiffiusinnaavoq. Qaqitanit ukiut ingerlaneranni kiassutsit, gassit aniatitaasimasut annertussusiat il. il. paasineqarsinnaapput.
Sermeq qaqitaq eqqorluartumik pisoqaassusiligaasarmat tassani takuneqarsinnaapput ukiuni ataasiakkaani – aamma ukiumi ataatsimi aasap ukiullu assigiinngissimassusii. Sivisunerusunilu klimap allanngortarsimaneri. Qillikkat misissornerat aamma siunissami klimassamut siulittuutinik eqqornerulersitsisinnaavoq.
Sermeq pisoqarsuaq
Kalaallit Nunaata sermersuanit qaqitat pisoqaanersaat ukiut 123.000 miss. pisoqaassuseqarpoq. Antarktisimi suli pisoqaanerujusuaq qillerivigineqarsimavoq, tassanili qaleriit saappallaaramik klimap oqaluttuassartaanik paasiffiusinnaanngillat.
Kiassutsimik paasisat
Sermimi erngup molekylii oqimaatsut oqitsullu imminnut naleqqiukkaanni apinerata nalaani kiassuseq paasineqassaaq. Taamatut misissuilluni kiassutsip allanngoriartorsimanera takussutissiorneqarsinnaavoq.
Gassinik aniatitanik paasisat
Sermersuup silaannartaaraani takuneqarsinnaavoq silaannarsuaq ukiut ingerlaneranni qanoq gassertaqartigisimasoq. CO2’rtaqassuseq ukiullu ingerlaneranni kiassutsip allanngorarnera ataqagiittut nalunanngeqaaq. Kiannerugaangat silaannaap CO2’rtaa ingasannerusarpoq nillernerugaangallu minnerusarluni.
Ukiuni 650.000-ini kingullerni silaannarsuaq aatsaat taama CO2’rtaqartigaaq.
Kiassutsip allanngorarnersua
Qillikkanit paasinarpoq kiassuseq arlaleriaqaluni allanngorujussuartarsimasoq. Sermersuaqarnermi kingullermi sukkaqisumik arlaleriarluni 20 gradit C-mut kiatsittarsimavoq. Sermersuaqarfiusumillu maannamut klima allanngoriataangaarami soorlu tassa attataasaq toorlugu.