Misissuiffimmi Zackenbergimi klimami allannguutit kinguneri nakkutigineqarput misissuiffigineqarlutillu. Arktisimik ilisimatuutut misissuineq tassani annerpaat ataqatigiinnerpaallu ilagisaata avatangiisinik alapernaassinera taaguuteqarpoq Zackenberg Basic. Tamatuma eqqaata uummaviini klimamut, uumaatsunut uumassusilinnullu tunngasut uuttortagassartaat assiinngitsut 1.500-t ukiuni 12-ni ukiut tamaasa uuttortagaapput. Tassa sorpassuit kuunneq, kinnerit assartugaanerat, sikkerarneq aamma qanga timmissat umimmaallu erniornerat ilanngullugit.
Zackenberg Tunup Avannaaniippoq, Ittoqqortoormiinit 450 km-it missaannik avannarliulluni. Dansk Polarcenterip 1995-imi pilersippaa, Namminersornerullutilli Oqartussat 2006-imi akisussaaffigilerpaat. Danmarks Miljøundersøgelser Århus Universitetimiittoq ilisimatuutut sulianik ataqatigiissaarivoq Asiaq Kalaallit Nunaanni Misissueqqaarnerit, Pinngortitaleriffillu ilaatigut suleqatigalugit. Zackenbergeqanngikkallarmat Avannaarsua Tunullu avannaa misissuiffiunngillat, atulerneranilli ilisimatuut 100-kkuutaat issinnerpaami sunannguaq tamaat misissoreerpaat.
Zackenbergip qoorua nunarsuarmi nunat allanngutsaaliukkat annersaata qeqqaniittoq inissiffittut toqqagaavoq tamaaniimmata issinnerpaap nunartai, uumasui naasuilu assigiinngiiaarpassuit.