COP15-imi angusat
2013-imiit 2020-mut Kalaallit Nunaata pisussaaffissai pillugit paaseqatigiinneq
COP15-ip ingerlanneqarnerani 2013-imiit 2020-mut Kalaallit Nunaanni aniatitsinerup annikillisinneqarnissaanut anguniakkat pillugit Danmarkilu paaseqatigiinnissaq Kalaallit Nunaata iluatsippaa.
Annikillisitsinissamut anguniakkat sisamanngorlugit avinneqarput:
Kalaallit Nunaata 2020 nallertinnagu gassinik silaannarmik kissatsitsisartunik aniatitsineq 2007-imi aniatitsinermut sanilliullugu 5 procentinik annikillisinniarpaa. Annikillisitsinissamut anguniagaqarnermi ullumikkut nunami suliat pineqarput, tassanili suliffissuarni nutaani, 2013-imiit 2020-mut pilersinneqarsinnaasuni suliat pineqanngillat.
Kalaallit Nunaat 2013-imiit 2020-mut nukissiuutit ataavartut ineriartortinneqarnerinut pilersinneqartarnerinullu pimoorussilluni aningaasaliisarniarpoq, 2020-mi nukissiuutit ataavartut atorlugit innaallagissiap, inuinnarnut atorneqartup 60 procentia sinnerlugu matussuserneqarnissaa anguniarneqassalluni.
Kalaallit Nunaat 2013-imiit 2020-mut nunat tamat akornanni piujuartussamik iluaqutaasumik ineriartortitsinissamut pitsaassuserititassat tunngavissallu naapertorlugit aatsitassarsiornernik, tassalu aatsitassarsiorfinnik ingerlatsinernik, uuliamik gassimillu tunisassiornernik ineriartortitsiniarpoq.
Kalaallit Nunaat 2013-imiit 2020-mut nunat tamat akornanni piujuartussamik iluaqutaasumik ineriartortitsinissamut pitsaassuserititassat tunngavissallu naapertorlugit suliffissuarnik, taakkununngalu ilanngullugu aluminiuliorfimmik, erngup nukinganik tunngaveqartumik 100 procentimik pilersorneqartunik ineriartortitsiniarpoq.
Annikillisitsinissamut anguniakkat annertupput, kisiannili 2020 nallertinnagu piviusunngortinneqarsinnaallutik. Inuiaqatigiinnut maannakkut piusunut tunngatillugu CO2-mik aniatitsineq 2020 nallertinnagu 5 procentinik annikillisissinnaavarput, tamatumali peqatigisaanik aamma annikillisitsinissamut anguniakkani Kalaallit Nunaanni suliffissuarnik ineriartortitsinissaq inissaqartinneqarpoq. Isertitassat nutaat atorlugit suliffissat ineriartortitsinerlu qulakkeerneqassapput. Suliffissuarnik nutaanik pilersitsinitsinni CO2 aniatitarput annertusisussaavoq, kisiannili avatangiisitsinnut silallu pissusaanut artukkiinissap killilersorneqarnissaa qulakkeerniarparput.
Allaaserisaq uani atuaruk: Kuupiup Lykke-mut allagaa ilassutitalik, 24. november 2009-meersoq
2013-imiit 2020-mut Kalaallit Nunaata annikillisitsinissamut pisussaaffii
Naalakkersuisut siulittaasuanit Kuupik Kleist-imit ilanngussaq, 2009-mi septembarimi nittartakkakkut tamanut saqqummiunneqartoq, uani www.COP15.dk.