Kalaallini inuiaqatigiinnut silap pissusaata allannguutai unammillerfissaqarlutillu periarfissaqarput.
Kalaallini inuiaqatigiit qanga piniarnermik inuussutillit aammalu Kalaallit Nunaat ullumikkut pinngortitaq qanimut attaveqarfigaat.
Aarleqqutit
Qanga piniarneq piniagaqartarnerlu inuussutissarsiutini pingaarnersaapput, sulilu aallaasinik pisarisinnaasaminnik imaluunniit sikumi ningittakkani pisanik kalaaleqarpoq tamakkuinnangajannik inuussuteqartunik. Ikiliartuinnarpulli, taamaattumillu kalaallini kultureqassutsip pingaartortaata ilaata tammarnissaanut aarleqquteqarpoq. Ullumikkut inuussutissarsiutini pingaarnerpaartaavoq aalisarneq, nunamullu aningaasanik isertitsivinni pingaarnerpaapput kinguppaat.
Piniarnermut piniagaqartarnermullu atugassarisanik allannguutit aseruivinnissaannik aarleqquteqartitsipput, pissutaalluni sikuusarnera tutsuiginarunnaarmat. Tamanna ilutigalugu immami kissassutsip qaffannera kinguppaat avannarparternissaannik kinguneqarsinnaavoq.
Periarfissallu
Taamaattorli Kalaallit Nunaannut allannguutit periarfissanik nutaanik nassataqarput. Aalisarnermut tunngatillugu piffissap ingerlanerani saarulliup kinguppaat inangersinnaavai, tassalu piniakkani pingaarnerpaatut isertitaqarfiunerpaatullu. Imartaq sikoqanngitsoq Kalaallit Nunaanni tunisassiorfiit assigiingnitsut ineriartuaarnissaminnut atugarissaarnerulernissaannut peqataaqataasinnaavoq. Kalaallit Nunaata eqqaani imartami uuliasiornissaq pisariuallaarunnaassaaq, takornariaqarnerlu piffissamut sivisunermut siammartinneqarsinnaalluni. Immaqalu aamma silap pissusaanik takornariaqarnertut taasartakkami annertoorsuarmik ilippanaateqartoqarpoq.
Nunataani Kalaallit Nunaata aatsitassarpassuinik siusinnerusumut naleqqiullugu atugaqarniarneq oqinnerulissaaq, mannalu tikillugu nunalerinermi naatitanik allanik naatitaqartarnissamut periarfissat pitsaanerulissapput. Nukissamik ataavartumik atuineq aammalu nukissamik atuinerup nungusaataannginnerusup misileraaffiginera issittumi teknologiimut immikkut ittumut tunisassiamik ineriartuaartitsinermik periarfissanik, kalaallini inuiaqatigiinnut aammalu Issittumi inuiaqatigiinnut allanut pingaaruteqartunik imaqarpoq.
Issittoq ukkatarineqartoq
Århus Universitetip 2009-mi marsip qaammataani silap pissusaa pillugu ataatsimeersuartitsineq Beyond Kyoto 1000-it missaannik peqataaffigineqartoq ingerlappaa. Ataatsimeersuarneq silap pissusaanut inassutaasunik arfineq-marlunnik kinguneqarpoq, taakkunani ataaseq Issittumi pissutsinik ukkataqartuulluni. Annermik atuarit uani.