Royal Arctic Line
Royal Arctic Line-p piginneqatigiiffiutaata Royal Arctic Bygdeservice A/S-ip inuiaqatigiit kalaallit inuussutissaniit nassiussanut ulorianartunut aammalu entreprenørinut maskiinanut angisuunut pilersugarai. Ingerlasussanik piareersaanermi aqutsinermilu suliassat tamakku isumaginissaannut umiarsuaatileqatigiiffiup umiarsuit Imarpik ikaarlugu angalasartut tallimat aamma nunaqarfinnut angalasartut tallimat suliassanik isumaginnittuusut pigisarai. Aamma Royal Arctic Line Kalaallit Nunaanni umiarsualivinni 13-iusuni umiarsualivinni oqartussaasuuvoq ingerlatsinermillu akisussaasuulluni, aammalu illoqarfinni qulini nassiussalerinermik quersuaqarnermillu ingerlataqarluni.
CO2 annikillisinniarlugu suliniuteqarpoq
Royal Arctic Line-p CO2-ip annikillisinnissaa pillugu Danmarkimi umiarsuaatileqatigiiffiit peqatigiiffiat suleqatigaa, aammalu umiarsuaatileqatigiit qanoq iliorlutik silap pissusaanut sunniutissat ajoqutaasinnaasut appartinniarneqarsinnaanersut pillugu suleqatigalugu.
CO2-mik aniatitsinerup annikillisinniarnerani CO2-mik atuinerup annikillisinneqarnissaa periusissaavoq ajornannginnerpaaq,. Tamanna angalasut arriillinerisigut, umiarsuit ingerlatsinerisa pitsanngortinnerisigut imaluunniit maninnerusunik ilusiliinikkut pisinnaavoq. Ullumikkut umiarsuarmi ingerlatsinermut aningaasartuutit tamarmiusut affangajaat ikummatissanut atorneqartarmata, silap pissusaa aningaasaqarnerlu eqqarsaatigalugit Royal Arctic Line umiarsuaatileqatigiiffittulli allatut umiarsuit pisinnaasaannik pitsannguissalluni pissutissaqarpoq.
Kisiannili Royal Arctic Line-p umiarsuarni CO2-mik atuinermik annikillisitsinissamut periarfissai killeqarput. Sukkassutsimik appaanissaq kisiat periarfissatuaraa. Tamatumali kingunerisaanik Kalaallit Nunaanni sapaatit akunnikkaartumik angalasarneq naammassineqarsinnaajunnaartussaavoq, tamannalu umiarsuaatileqatigiiffiup sullitaanut eqquisussaavoq. 
Annertuumik sikusiutaasinnaasut CO2-mik annertunerusumik atuisarput
Umiarsuarnik nutaanik pilersaarusiornermi Kalaallit Nunaat tamakkerlugu pilersuisussaatitaaneq qulakkeerniarlugu umiarsuit annertuumik sikusiutaasinnaanissaat piumasarineqartarpoq. Tassalu umiarsuit qaleriinnik timitalerneqassapput, aammalu umiarsuit ilusiligaaneranni sisaat qajannaarutaasut qajannaannerussapput. Umiarsuarnut sikusiutaanngitsunut sanilliullutik oqimaannerulertarput, tamatumalu aamma nassataanik ikummatissamik atuinerat, taamaalillunilu CO2-mik aniatitsinerat annertunerulertarluni. Aamma nunat issittut imartaanni umiarsuit maninnerusunik qallernissaat ajornakusoorpoq, qalliutit taamaattut sikusiutigissallugit naleqqutinngimmata.
Suliniutit nutaat pingasut
Royal Arctic Line-mi CO2-mik aniatitsinerup annikillisinnissaanut pingaartumik suliniutit pingasut nutaat ingerlanneqarput.
- Fuel Management atortuuvoq, ornitamik sukkassutsimillu allannguinerup uuliamik atuinermut sunniutaanik paasisaqarfiunerusussaq. Umiarsuaatileqatigiiffiup umiarsuaatai containerersortut Imarpik ikaarlugu angalariaasiat ingerlaavartuummat, motoorinik motoorinillu tapertaasunik atueriaatsit assigiinngitsut toqqaannartumik atorneqarnerini uuliap atorneqartup uuttorneqartarnissaa iluaqutaasinnaavoq. Royal Arctic Line-p taamaalilluni ikummatissanik atuineq pitsaanerpaaq anguniarlugu pissutsit suut umiarsuaatileqatigiiffiup atorunnaarsinnaanerai aammalu maskiinanik atueriaatsinik aalajangersimasunik atuisinnaanersoq misissuiffigisinnaavaa.
- Homogenizer – Emulgator pumpiuvoq, ikummatissami sananeqaatinik minnernik amerlanerusunik aseruisarnissamik siunertaqartoq. Uuliat umiarsuarnut containerersortunut atorneqartartut ilaat ikummatissartaat sananeqaatinik angissusertik pissutigalugu ikummarneq ajortunik akoqartarput. Sananeqaatit ikummatissamut akuusut taakku ikummatissap 1-2%-ianik annertussuseqartarput. Emulgatorip sananeqaatit taakku aserorneqarnissaat siunertaraa, taamaalillunilu umiarsuaatileqatigiiffiup ikummatissanik atuinera pitsanngortinneqarsinnaavoq, ikummatissarlu 5-6% tikillugu sipaarfigisinnaallugu. Tamatuma peqatigisaanik uuliakoq nunamut tunniunneqartartoq annikillisinneqarsinnaavoq.
- 2010-imi angalanissanut pilersaarut suliarineqarpoq, qaammatinilu sisamani siullerni allannguuteqangaatsiarsinnaanissaa ilimanarpoq. Maanna sapaatit akunnikkaartumik tikittarnermut taarsiullugu Royal Arctic Line-p Namminersorlutik Oqartussat sullitallu annerit suleqatigalugit siornatigut ullut aqqanilikkaarlugit tikittarnermut uternissani eqqarsaatigaa. Tamanna malunnaatilimmik CO2-mik annikillisitsissaaq, tassani umiarsuit sukkassusissatut annertussusiliussaq, tassalu ullumikkornit arriinnerusoq atortalissammassuk, ikummatissarlu annikinnerusoq atortalissallugu. Tamatuma peqatigisaanik umiarsuit usisinnaassusiat atorluarneqarnerulissaaq, tamatumalu kingunerisaanik containerimut ataatsimut aniatitat, imaluunniit nassiussanut assartorneqartunut naleqqiullugu aniatitat tamarmiusut appartinneqangaatsiassapput. Kisiannili tassani soorunami inuiaqatigiit umiarsuit siornatigumut naleqqiullugu umiarsuarnik tikinneqartarunnaarnermikkut sunnerneqarnissaat akigitinneqassaaq.