Issittumi teknologii
Issittumi immikkoortoqarfinni sanaartorneq, avatangiisini pilersaarusiorneq aamma pinngortitami isumalluutinik piiaaneq issittumi teknologiip nakkutigisarai.
- Illuliorneq sanaartornerlu. Silap pissusaani issittuusumi, seqernup qatsissutsimigut pukkitsuusumi illuliornermik, aammalu nunaannartami qaqqaqarasaartumi nunamilu qeriuaannartuusumi aqqusinniornermik nakkutiginninneq.
- Avatangiisit aamma pilersaarusiorneq. Issittumi pinngortitami mianernartumi avatangiisinik isumannaarineq aammalu inuiaqatigiinni avinngarusimasuni sumiiffinni inuttakitsuni nammatsisinnaasumik ineriartortitsineq.
- Geologii aamma atortussiassat. Issittumi pinngortitami isumalluutinik ujaasineq, nalunaarsuineq aamma piiaaneq.
Issittumi teknologiip ineriartortinneranut tunngatillugu Kalaallit Nunaata siuttuniilernissaanik suliniutit arlallit tikkuussipput. Kalaallini inuiaqatigiinni imminermini tamanna assorsuaq pingaaruteqarsinnaavoq, ilutigalugulu issittumi inuiaqatigiinnut allanut tuniniaanissamut annertuumik ilippanaateqarpoq.
Artek, Center for Arktisk Teknologi, aamma GIC, Grønlands InnovationsCenter immikkoortortami tassani pingaarutilittut peqataaqataapput. Artek, DTU-mut attaveqartoq, issittumi teknologiimi immikkut sammisaqarfiusumik ingeniøritut ilinniagaqarnermik aamma neqerooruteqarpoq.