ARTEK, Center for Arktisk Teknologi
ARTEK sanaartornerup, avatangiisit aamma nukissap iluani ilinniartitsinikkut, ilisimatusarnikkut aamma nutaaliornikkut issittumi teknologiimi ilisimasanik ineriartortitsinissamut ilapittuuteqarnissamik erseqqissumik anguniagaqarpoq.
Ilinniartitaaneq assut pingaartillugu
Ilaatigut ingeniørinik assorsuaq piginnaaneqartunik ilinniagaqartitsinikkut kalaallini inuiaqatigiinnut namminneq attassisinnaasunut namminersortunullu ARTEK ilapittuuteqarpoq. Piviusuni ilaatigut tassaavoq Arktisk Ingeniørimik ilinniagaqarnerup ineriartorteqqinnera. Aammattaaq ingeniørinngornianut issittumi teknologii pillugu immikkut ittumik semesterimik, ukiumoortumik sammisanik ataatsimeersuarnernik aaqqissuussinernik il.il. ilinniarfik neqerooruteqartarpoq.
Ilisimatusarneq pingaarutilik
Silap pissusaata allanngorneranut tunngatitanik ilisimatusarnerup iluani ARTEK aamma nunani tamalaani peqataaqataavoq. Illuliornermut sanaartornermullu teknikkip, avatangiisit aamma atortussiassaqarfiup, kiisalu nukissiornerup iluini ingeniørinut tunngassuteqartunik ilisimatusartoqarpoq.
Suliniutit piviusut
ARTEK-ip suliaasa pingaartut ilagaat piviusunik ineriartortitanik suliniutit, nukissap nunguttussaanngitsup atorneqarnera aamma nukissamik sipaarniutit pingaarnerutillugit. Assersuutit piviusut makkuupput:
Sisimiuni Knud Rasmussens Højskoliani seqernup nukinganik pilersuiffik
Sisimiuni Knud Rasmussenip Højskoliani seqernup kissaanik pilersuiffik siuarsagaq nutaaq 2008-mi aggustimi atorneqalerpoq. Nunarsuarmi seqinermut kaaviinnartumut naleqqussagaanini pissutigalugu pilersuiffik sanaani siullersaavoq. Annermik atuagassat
Sisimiuni illu nukimmik atuinikiffik
Illu seqernup kissaanik pilersorneqarpoq, igalaavi pitsaalluarlutik, kissamik uterteqqiisartumik silaannarissarfeqarluni, Kalaallit Nunaannilu kiffiutinut atorneqartartunut naleqqiullugu silinnerujussuarnik kiffiusersorneqarsimalluni. Illu ima ilusilersugaavoq toqqaannartumik illup atuineranik, iluani silaannaanik il.il. nakkutilliisoqarsinnaalluni. Annermik atuagassat
Eqalussuarmit biogassimut
Nukissiorfiit suleqatigalugit ARTEK suliniutinik nunguttussaanngitsunik nukissaqarfiit atorneqarnissaannik ilippanaatinik misissuiffissanik suliaqarpoq. Avannaani illoqarfinni arlalinni suliniutit ingerlanneqarput, innaallagissamik, kiassaanermik imermillu pilersuinermi, kiisalu eqqaavilerinermi teknikkikkut avatangiisitigullu pissutsinik atoruminarnerpaanik pilersitsiniassallutik. Ilisimatusarnikkut suliniut alla tassaavoq nunatsinni eqalussuup biogassinngortinnissaa. Isuma tassaavoq eqalussuup neqaata imikumik makroalginillu akulerunnissaa, nerpik aserortiganngorlugu biogassiliornermut biomassetut isumalluutinngortillugu.
DTU-mut attavik
ARTEK qanimut DTU-mut, Danmarks Tekniske Universitetimut attaveqarpoq, ARTEK-ilu aqutsisoqatigiinnit nunatsinnit Danmarkimiillu inunnit 5-7-init aqunneqarpoq. Nunatsinnit Danmarkimiillu sammisanik ilisimasallit 10-12-it malittarisallit ilinniarfiup ilinniakkanik pilersitsinissaanut aammalu sammisatigut eqqortunik imalinnik pikkorissarnernik isummersugaraat.