Kalaallit Nunaanni illu nukimmik atuinikitsoq tassaavoq kalaallini sanaartornermut malittarisassani piumasaqaataagaluartumik nukimmik annerpaamik affaannaanik atuisoq.
Kalaallit Nunaanni illut tamaattut ikittuinnaapput, 2005-imili Sisimiuni suliniutitut illu marloqiusaq sananeqarpoq. Tassani suleqatigiipput Sisimiuni Sanaartornermik Ilinniarfik, Center for Arktisk Teknologi, Danmarks Tekniske Universitet aamma kalaallini suliffeqarfiit.
Illu nukimmik atuinikitsoq 197 m2-iuvoq. Affarlia attartortinneqarpoq, kalaallinut ilaqutariinnut nalinginnaasumik illugineqarluni, aappaali misissuivittut atugaavoq, tassaniillutik uuttortaatit illumi nillussutsimik isugutassutsimillu uuttortaasut.
Issittumi sanaartornermut ilisimasaqarfittut illup atuutsinnissaa siunertarineqarpoq, aammalu issittoqarfinni siunissami sanaartornissanut isumassarsiviussalluni.
Nukimmik atugaqarnerup pitsaanerpaanngortinnera isumalluutit pinngortitaneersut atornerisigut pivoq, assersuutigalugit seqernup kissaanik uunnaavitsigut, silaannarissaanermi kissap atugaaqqinneratigut, illut sananeqaataasigut aamma nunaannartamut naleqqussaanikkut.
Illup nukimmik atuinera uuttortartuarneqarlunilu nalilersorneqartuarpoq, naatsorsuutigisamullu inernerit naleqqutinngitsut misissorneqarlutillu nukimmik atugaqarluni sanaartorneq pillugu ilisimasanik nutaanik tunisipput. Ukiumi siullermi illup nukimmik atuinikitsup nukimmik atugaqarneranik uuttortaanerit takutippaat illu init kissassarnerinut ukiumut 140 kWh/m2-it missaannik atugaqarsimasoq. Sanaartornissamut malittarisassami ukiumut 230 kWh/m2-imut naleqqiullugu annikingaatsiarpoq, ukiumulli 80 kWh/m2-imut kiassarnerut atugaqarneq pillugu anguniakkamit annertunerulluni. Ukiup tulliani uuttortaanerit takutippai silaannarissaanermut suujorit naleqqutinngitsumik ivertissimaneri kiassarnermi annaasaqarnermik pilersitsisimasut.
Suliniut Villum Kann Rasmussen Fondianit aamma A.P. Møllers Fondianit tapiiffigineqarpoq.