Nukissiassat ilusaat nutaat
Naalakkersuisuni Kalaallit Nunaata ikummatissanit uumassusilinnit pilerfeqartunit sapinngisamik annertunerpaamik pisariaqartitsiunnaarnissaa anguniarneqarpoq. Tamatumunnga atatillugu misileraaffigisarujussuaq tassaavoq erngup nukissiorneq, aammattaarlu seqinermit nukissamik misileraanernik ingerlatsisoqarpoq. Aammattaarli nukissiassat ilusaat nutaat allat isumaliutigineqarput. Ilaatigut tamakku tassaapput:
- Innaallagissamik pilersuinermut anorimit nukissiorneq, pingaarnerpaamik Kujataani, anorlernerpaaffiusartumi.
- Innaallagissamik pilersuinermut erngup nukissiorfeeraaraliorneq, mikrovandkraft. Ingammik savaatileqarfinni, aammalu nunaqarfinni erngup nukissiorfissuarnut ilippanaateqanngitsuni imaluunniit pisiaqartitsiviunngitsuni naleqquttuusoq.
- Tinittarnera ulittarneralu, aammalu mallit, sumiiffinni sikuneq ajortuni innaallagissamik pilersuinermut atorneqarsinnaasut.
- Geotermik, nunap iluata kissarneranik nukissiorneq, tassaavoq nunap iluanit erngup kissartup atorneqarnera, aammalu geoenergi, nunap iluanit nukissaq imaluunniit qaqqap kissarnera, tassani qaqqami kissassutsip aamma silap kissassusaata akornanni assigiinngissummi nukissaq atorneqarluni.
Ineriartortitsinissamik pisariaqartitsisoqarnera
Nukissiornerit ilusaasa tamakku atorneqarnerinut killiffik nalinginnaq tassaavoq tamakku teknologiimi ineriartortitsinermik aammalu issittumi pissutsinut naleqqussaanermik pisariaqartitsinerat. Tamanna ilutigalugu Kalaallit Nunaanni silap pissusai immikkut ittut pissutaallutik nukissiornerit ilusaasa ataqatigiissinnissaat pisariaqassagunarput.
Ilisimatusarneq aamma ineriartortitsineq
Nukiup nunguttussaanngitsup iluani ilisimatusarnikkut aamma ineriartortitsinikkut suliniutit assigiinngitsut Namminersorlutik Oqartussat tapersersorsimavai, taakkulu ilaatigut pilersuiveqarfimmit Nukissiorfimmit aamma ARTEK, Center for Arktisk Teknologi isumagineqarput.
Nukissamik nunguttussaanngitsumik pisiortorneq
Nukissamik pilersuisoqarfinnit namminersortuusunit, avatangiisinut iluaqutaaffinnit nukissamik Nukissiorfiit pisiortortarnissaannik Naalakkersuisunit peqquneqarsimapput, taamaattorli pingaarnerutitatut nukissamik pilersuinermut pilersaarusiorneq, inuiaqatigiinni aningaasaqarneq aamma pilersuinermi isumannaatsuutitsineq sianigineqassallutik.