Greenland Connect – kabeli immap iluatigut
Greenland Connect tassaavoq immap iluatigoortillugu kabeli Nuummik Qaqortumillu Newfoundlandimik Islandimillu attaviliisoq. Taakkunanngaanniit Amerika Avannarlermi aamma Europami telekkut attaveqaataasunut ingerlaqqiffeqarpoq.
Kabeli immap iluatigoortoq qorsuk
TELE Greenland A/S nunani pingasuni tamani nunniffiliorsimavoq, taakkunani kabeli sarfalersorneqarluni. Taakkunani tamani nukissaq qorsuk atugaavoq. Kalaallit Nunaanni Nuummi Qorlortorsuarmilu erngup nukissiorfinnit sarfalersuisoqarpoq.
Kabeli ima piginnaaneqartigaaq kabelit Atlantikumik ikaarsisut allat tamarmik kattullugit piginnaassusaat assigalugit. Teknologiip nutaarluinnaap atorneqarnera piginnaaneqarnerujussuanut pingaarnertut patsisaavoq.
Kabelip attaviliunnera imartami avatangiisit assorsuaq sianigisaralugit pisimavoq. Immap naqqanik misissuisoqarlunilu avatangiisinik nalunaarusiortoqarsimavoq. Nunani attuumaffeqarfinni oqartussaasut soqutigisaqaqatigiiffiillu suleqatigalugit najukkani pissutsinut naleqqussarlugu aqqut inissinneqarsimavoq.
Periarfissat nukissamut torersut
Kalaallit Nunaanni pisariaqartitsineq sinnerujussuarlugu kabeli piginnaassuseqarpoq. Taamaattumik Kalaallit Nunaanni nutaanik avammut tunisinissamut inuussutissarsiornikkullu periarfissanik ammaavoq. Siunissami qarasaasialerineq qorsuk unammillernermi takussutissiivinngussaaq pingaarutilik, internetimillu sullissivinnik piginnittunut, Google, Facebook allallu erngup nukissiornermit serverinut, nillorsaatinut il.il. pilersuinerit pissarsiaqarfiunissaat qarasaasiaqarfiit nukimmik atuisupilussuit sanaartornissaat pilersinarlunilu malunnaateqarfiusinnaavoq.
Ilanngullugit Kalaallit Nunaata nunarsuullu sinnerata akornanni attaveqaqatigiinnissamik periarfissat pitsanngorsarpai, taamaalilluni assersuutigalugu video aqqutigalugu ataatsimiinnikkut angalanerit annikillisarlugillu avatangiisimut CO2 aniatippallaarunnaassallugu.
Kabelip aamma radiot atassuteqatigiiaatigut attaveqaqatigiinnermik pisariaqartitsineq annikillisippaa, tamakkunanimi innaallagissiornermut generatorit dieselitortut atorneqartuarput.