Umiarsuarnermi nutaanik pitsaanernillu periarfissat
Immami siku annertussutsimigut silissutsimigullu milliartuinnarpoq, siulittuutillu tamarmik naapertorlugit ineriartorneruvoq ingerlaannartussaq – immaqalu annertusiartuinnartussaq.
Aalisarnermut attaveqarnermullu periarfissat nutaat
Taamatut ineriartortoqarnera piniartunut aallaanianullu, aammalu uumasut suussusiisa ilaannut ajornartorsiuterujussuarnik nassataqarpoq. Iluatigaluguli nutaanik periarfissaqalissaaq. Aalisarnermut, pitsaanernik atugassaqalissaaq – ukiumilu sivisunerusumi umiarsualiviit sikusimaneq ajussapput. Ingammik ilaasunik assartukkanillu immakkut angallassinermut tamanna assut pingaaruteqarpoq. Kalaallini attaveqarnermi immakkut angallanneq pingaartuujuaannarsimavoq. Siunissami umiarsuarmik angallanneq suli pingaaruteqarnerulissaaq. Ukiut qulit kingulliit iluini umiarsuarujussuit amerlassusaat tallimariaataasa sinnerinerik amerleriarsimapput.
Immakkut takornariaqarneq atugassarissaarnerulertoq
Ingammik 1990-ikkut qiteqqunnerannit umiarsuarmik angallanneq takornariaqarnermut pingaaruteqaleriartuinnarsimavoq. Nunap iluani kalaallini sineriaat atuarlugit umiarsuarmik angallanneq aammalu aqqutaani sumiiffinnut amerlasuunut ikaartarneq nuannarineqaqaaq.
Allaammi umiarsuarmik angalallutik takornariat Kalaallit Nunaat sumiissusersisimavaat. Nunarsuarmit umiarsuarnut takornariartaatinut ukiup ingerlanerani imartaq sikuusannerusoq sivikinnerusumillu sikusartoq orniginarninngussaaq. Umiarsuarni takornariartaatini 2008-mi aasakkut ilaasut 30.000-iupput.
Nunarsuarmi aqqutit nutaat
Nunarsuarmi umiarsuakkut angallannermut periarfissat immikkut illuinnartut siunissami atugassaalissapput siulittuutit eqquutissappata, tassalu Nordøst- aamma Nordvestpassaget aappaata Ruslandip aappaatalu Canada avaqqullugit ingerlavissat sikueruppata.
Angallanneq annertunerulersoq isumannaallisaanermut avatangiisinullu nutaanik piumasaqaateqarfiulerpoq.